National

सुप्रीम कोर्ट :-लग्नानंतर महिलेच्या धर्मात बदल होत नाही.

marriage

लग्नानंतर पतीचा धर्म असेल तोच त्याच्या पत्नीचाही होतो, असा निकाल मुंबई उच्च न्यायालयाने दिला होता. त्यावर सर्वोच्च न्यायालयाने असहमती दर्शवली आहे. तसेच महिलेला ‘टॉवर ऑफ सायलेंस’ मध्ये जाण्यास परवानगी न देणारा निर्णय ‘वलसाड जोरोऑस्ट्रियन ट्रस्ट’ने मागे घ्यावा, असे आदेश दिले आहेत. लग्न झाले म्हणून कोणत्याही महिलेला तिच्या मानवी हक्कांपासून वंचित ठेवता येणार नाही, असेही न्यायालयाने स्पष्ट केले.

गुलरोख एम. गुप्ता या पारसी महिलेने दुसऱ्या धर्माच्या व्यक्तीशी लग्न केले होते. त्यामुळे पालकांच्या अंत्यसंस्कार विधीत त्यांना सहभागी होऊ दिले नाही. ट्रस्टने त्यांना ‘टॉवर ऑफ सायलेंस’मध्येही जाण्यापासून रोखले. त्याविरोधात त्यांनी उच्च न्यायालयात याचिका दाखल केली होती. मात्र, न्यायालयाने ट्रस्टच्या बाजूने निकाल दिला. त्याला सर्वोच्च न्यायालयात आव्हान दिले होते. त्यावर सरन्यायाधीश दीपक मिश्रा, न्या. ए. के. सीकरी, ए. एम. खानविलकर, डी. वाय. चंद्रचूड आणि अशोक भूषण यांच्या खंडपीठासमोर सुनावणी झाली. दुसऱ्या धर्माच्या मुलीशी लग्न करणाऱ्या पारसी पुरुषाला पालकांच्या अंत्यविधीत सहभागी होण्यापासून रोखले जात नाही, मग महिलेला अशी वागणूक का, असा सवाल खंडपीठाने केला. लग्न झाले म्हणून त्या महिलेला मानवी हक्कांपासून वंचित ठेवता येणार नाही, असे खंडपीठाने म्हटले.

लग्नानंतर महिला तिच्या पतीशी बांधिल आहे, असा अर्थ होत नाही. महिलेला ‘टॉवर ऑफ सायलेंस’मध्ये जाण्यापासून रोखणारा असा कोणताच कायदा अस्तित्वात नाही. महिला तिच्या पतीचा धर्म स्वतःहून स्वीकारत नाही, तोपर्यंत पतीच्या धर्मानुसार महिलेचा धर्म बदलू शकत नाही, असे न्यायालयाने स्पष्ट केले.

तुमची प्रतिक्रिया नोंदवा
टॅग्ज
अजून दाखवा

संबंधित लेख

Close
%d bloggers like this: